Psalms 30

Maombi Ya Shukrani

Utenzi Wa Kuweka Wakfu Hekalu (Zaburi Ya Daudi)

1 ^aNitakutukuza wewe, Ee Bwana,
kwa kuwa umeniinua kutoka vilindi,
na hukuacha adui zangu
washangilie juu yangu.

2 ^bEe Bwana, Mungu wangu, nilikuita unisaidie
na wewe umeniponya.

3 ^cEe Bwana, umenitoa Kuzimu,
umeniokoa nisishuke kwenye shimo la mauti.

4 ^dMwimbieni Bwana, enyi watakatifu wake;
lisifuni jina lake takatifu.

5 ^eKwa maana hasira yake ni ya muda mfupi,
bali upendo wake hudumu siku zote.
Inawezekana kilio kiwepo usiku kucha,
lakini asubuhi kukawa na furaha.

6 ^fNilipofanikiwa nilisema,
“Sitatikiswa kamwe.”

7 ^gEe Bwana, uliponijalia,
uliuimarisha mlima wangu,
lakini ulipouficha uso wako
nilifadhaika.

8 Kwako wewe, Ee Bwana, niliita,
kwa Bwana niliomba rehema:

9 ^h“Kuna faida gani katika kuangamia kwangu?
Katika kushuka kwangu shimoni?
Je, mavumbi yatakusifu?
Je, yatatangaza uaminifu wako?

10 ⁱEe Bwana, unisikie na kunihurumia,
Ee Bwana, uwe msaada wangu.”

11 ^jUligeuza maombolezo yangu kuwa kucheza,
ulinivua nguo za gunia ukanivika shangwe,

12 ^kili moyo wangu uweze kukusifu na usikae kimya.
Ee Bwana Mwenyezi Mungu wangu, nitakushukuru milele.